「RE」就係Renewable Energy, 中文即係「再生能源」,而「100」就係指100%, RE100即係100%再生能源. 但要小心零碳唔等於綠電, 好似核電好多地方會叫零碳. 雖然核電喺發電過程, 唔會點產生溫室氣體, 睇落好似好乾淨咁. 但RE100嘅定義好嚴格, 只計真正「可再生」嘅能源. 核電嘅燃料(鈾)係要開採嘅, 總有用完嘅一日, 所以唔算再生能源. 再加上核廢料處理問題, 一直都好有爭議.
RE100成員暫時主要由啲大公司好似Apple, Google, IKEA參加, 涵蓋科技,製造,零售,金融等行業, 而美國,日本與英國企業佔多數. 企業透過 PPA,自建電廠或購買能源屬性證書實現目標, 由此見得環保對呢類大牌子嘅公司形象好緊要.
香港政府喺呢方面直情係大幅落後. 例如新加坡會向唔同國家購買可再生電力, 包括遇到少少問題嘅澳洲Sun Cable計劃. 另外仲有從其他東南亞鄰國購買綠電計劃, 至少有印尼,泰國,馬來西亞,柬埔寨同寮國等國家參與. 反觀香港因為背靠祖國嘅關係, 暫時未見有購買可再生電力嘅規劃, 反而就不斷推廣香港使用零碳能源. 雖然中國積極都發展緊可再生能源, 但香港政府呢方面明顯較新加坡被動.