希望搭到順風順水嘅順風車

做生意,有時真係講運氣.

美國內政部上個月(2025年12月)出咗份指令,將地熱租賃由2年拍賣一次改成每年拍賣一次,目標係將至少90%合資格提名地塊納入當年度拍賣計劃,全世界最大個地熱莊家,終於肯加快派牌速度,希望呢次我哋都順利搭到呢班順風車.

節奏快咗,翻檯快咗,當然係好事.不過真正令我哋覺得安慰嘅,係睇到個美國終於設立咗一道更嚴格 :想攞OBBBA嗰類稅務優惠,供應鏈同合規要求就要避開FEOC(外國關注實體)相關限制.好彩當年決定將公司遷冊去新加坡,起碼喺架構上早一步,合規壓力細啲,但供應鏈仍然要逐樣拆,逐樣砌返啱.

面對住美國呢個咁龐大又陌生嘅市場,雖然手握入場券,不過我哋依然用戰戰兢兢嘅心情去面對,同埋重新學習呢邊嘅玩法,文化,甚至係地質結構.另外就係我哋一路擴充緊銷售團隊,同時間亦推動研發團隊,在地化咁根據美國嘅地質數據,加快產品迭代.

依家市面上,合規又有實戰數據嘅331°C微型Sensor唔多,希望我哋手頭好呢手好牌,可以加快鋪頭現金流,亦開始有行家想試我哋隻鑽井泥,我哋盡力調配適合唔同公司用嘅配方,希望可以喺成個產業鏈入面,可以擔任解決方案嘅角色.

呢個雞棚等咗9個月

2025年麥肯錫出咗份EGS (增強型地熱系統)嘅報告(Link), 印證咗我個預測,EGS將受惠於美國大力發展頁岩油,就算只係搭雞棚,都夠做幾年.

2025年6月我屋企舖頭遷冊新加坡,同時亦正式脫離前母公司,呢個部署咗超過5年嘅計劃,母公司董事局一路都清楚,但真心感激班叔父信任,仲有一班同我一齊癲嘅伙記.因為你哋嘅付出,我哋唔單止行啱咗條路,仲好肯定超前部署咗至少9個月.

大家都知係特朗普再上場,頁岩油一定係火車頭,而EGS嘅核心技術同前者好相似.都係要向地底深處鑽井,然後用高壓水力去「震裂」啲石頭,一個逼啲油同天然氣出嚟;另一個,就喺石頭入面製造裂縫,注入水,經唔同管道將地底嘅熱能帶上嚟轉為動能發電.

老實講, 呢兩樣技術都唔係啲咩「環保」嘅嘢,直情唔環保添,仲會有機會引發地震或導致少量地殼變動,所以歐洲好少用EGS做地熱井,就算美國,某啲州份都唔準開採頁岩油,不過既然特朗普政府對頁岩油產業鏈開綠燈,就一定會得到前所未有嘅政策支持.而開採頁岩油嘅技術同架生都可以應用返落EGS地熱井入面使用,反正我哋呢類鑽井公司啲設備同技術都會撈埋一齊用,所以我年頭就膽粗粗提議董事局All-In落美國EGS市場,等咗差唔多9個月,終於有份似樣啲嘅報告出咗,叫做開始有運行.

其實麥肯錫份報告好簡單,指出EGS嘅成本將會因為技術成熟而大幅下降,幾十年後美國會唔會有多啲地熱發電我唔知,但呢個月就有間叫Dig Energy新創又拎到孵化基金,成單嘢有陣「雞棚」味,所以我哋呢類下欄工程公司,幫手整大塊餅又分吓餅仔咁,至少3年唔愁冇工開.

對我哋嚟講,都已經係夠飽飽,通常搵Dig Energy呢類新創公司合作,睇下有冇機會用最快速度搶佔更多市場份額,到時拎埋份料再返歐洲睇睇會唔會再𢲷啲再大啲嘢工程做.

其實我哋喺歐洲做「地底」工程已經超過廿年,初時掘排污渠,之後鋪食水管,然後掘隧道,仲要主打「環保」工藝隧道,2008年開始做地質鑽探,2012先再同大學合作研發環保鑽探地熱方向,呢十幾年主打CGS(閉環地熱系統),近年開始研發用臨界水同臨界二氧化碳做導熱流體,可惜一場疫情都叫打散咗上面堆資金鍊,而加得返毫米波鑽井技術個研發仲係繼續.

呢次憑我哋嘅超前部署同技術積累,希望可以去美國發展EGS俾我哋回吓氣,希望再有足夠資金繼續研發更加環保嘅地熱發電或地熱儲能系統.

微型Sensor注入鑽井液征服高溫

2022年開始研發嘅「超熱岩」技術終於面世. 基於早年我哋喺日本試搞超臨界水地熱技術時, 因為地下水酸度過高, 要實現封閉內循環管道維修, 面對嘅挑戰好大. 所以呢次改用「熱晶格」技術, 直接向超過3百幾度嘅岩石注入冷水, 利用熱縮冷脹令岩石自己裂開, 形成一個立體嘅微裂縫網絡, 喺我舖頭嚟講, 歸入埋落EGS嘅變種技術.

呢種技術最大嘅優點係, 當岩石自己裂開, 形成大量立體嘅微裂縫網絡, 減少引發地震嘅風險. 而呢個開發專案另一個最突破性嘅技術, 係將耐高溫嘅微型Sensor注入鑽井液入面, Sensor會跟住鑽井液, 深入鑽頭位置進行實時偵測, 而鑽井液同時為Sensor提供保護. 淨係調配適當份量嘅膨潤土同其他化合物組合, 再注入微型Sensor呢個研發過程都已經搞咗超過2年先成功, 而我哋耐高溫且抗壓嘅訊號轉發系統亦大派用場.

以前鑽呢種高溫井, 最大問題係啲電子儀器一落去就溶, 鑽頭亦頂唔順. 呢次終於喺鑽井錄得331°C嘅井底溫度, 其實破晒EGS嘅世界紀錄, 就算大陸鑽到10公里深, 井底溫度都只係2百幾度. 我哋有賴注入微型Sensor鑽井液呢個發明, 先可以將偵測系統放到最接近鑽頭嘅位置, 最終協助整套鑽井順利喺高溫環境下運作, 亦證明我哋成套系統將可以喺更極端嘅環境下運作.

除咗鑽得深, 環保嗰關都要過. EGS成日俾人鬧爆會引致地震, 但呢次配合埋「誘導地震緩解計劃」, 根據得到嘅數據顯示, 呢種做法的確將有感地震風險減到最低.

雖然依家只係技術驗證階段, 但我哋會繼續研發更好嘅地熱能源鑽井方案.

EGS都可以好溫柔

要講中國大陸嗰種用蠻力發展產業, 晶片以外, 鑽井都係個好例子, 喺深層鑽探嘅技術, 中國無可否認已達世一水平, 近期已經鑽到落10公里深, 不過呢種「大力出奇蹟」嘅解決方案, 唔係好啱我哋鋪頭胃口.

喺歐洲嗰邊要申請爆破性EGS並唔容易, 以前嘅玩法好粗暴, 將啲水夾梗逼到石層裂開, 但地底壓力太快轉變, 就會引致地震. 不過我哋未停過研發唔同嘅方法鑽井, 所以以往EGS會引來「有感」地震問題, 已經可以減低至零, 只係歐洲都係. 呢幾年我哋喺爆開岩石嘅罅隙前, 會先幫岩層「按摩」, 透過預先造成無感地震, 先卸去地底壓力, 避免工程對地面造成任何「有感」影響. 除此之外, 我哋亦引入油田開採技術嘅「水平鑽井」, 當鑽到某個位頂住, 又唔可以用水力爆開比較硬嘅石層, 咁就會靈活咁使用可以轉彎嘅鑽頭, 配合我哋鋪頭喺Lab計出, 由一個「熱點」打橫行, 變為一大塊「熱區」, 開採地熱能. 最後現時開始成熟嘅「閉環系統」(Closed-Loop)超臨界水/二氧化碳技術, 減少影響地下水之餘, 仲可以透過更幼細嘅管道為帶熱媒介, 提高帶熱能力.

我哋可以提供大量解決方案, 配合唔同情況, 有啲用少少壓裂技術, 有啲由熱點整到變熱區, 有啲就揀閉環方式乾手淨腳. 呢幾年我哋已經幫好多客試過唔同組合, 有啲work, 有啲都係大家當交學費. 都係嗰句, 我哋只想運用我哋嘅技術, 幫手搵更多可再生嘅地熱能, 無論污唔污糟, 難唔難搞, 我哋都願意嘗試幫地球同人類命運共同體(背靠祖國係咪都要扮吓有相同嘅語言?!誤!)出一分力.

Drill, Baby, Drill.

戴返個頭盔先, 賄賂點講都唔啱. 尤其是用私人飛機運成箱成箱Cash去非洲派. 但亦都可以話Glencore真係唔好彩, 呢行有邊間鑽地公司隻手係乾淨㗎? 今次佢哋交完幾億罰款, 啲高層仲要俾人追住嚟告. 諷刺係, 涉嫌犯法嗰段時期, 和黃前大班馬世民喺佢哋公司坐緊Board.

講返正題, 只要你嘅鑽井超過某個程度深度, 地熱係俾礦業法管轄, 喺《礦業法》框架下, 喺歐洲鑽一個窿, 「前期」工作至少2步.

第一步: 霸位 (勘探許可).

呢步唔係叫你郁手. 你要同礦業管理局證明你有計劃(Work Program), 有錢(Financial Viability), 唔係亂咁嚟(Geological Report). 批咗, 呢塊地三五年內可以繼續鑽.

第二步: 拎開工紙 (鑽井許可).

要話俾政府知, 你支鑽頭插落去, 每一米會發生咩事, 環境影響評估, 你要預測所有最壞情況, 由地下水污染到引發微地震, 然後再話俾佢哋知你點拆, 然後要講埋用咩鑽井方法, 用咩鑽頭, 咩泥漿, 轉速幾多, 全部要寫清楚.

行完呢兩步, 仲有一大班唔同部門等住你招呼佢哋, 然後仲要搞公眾諮詢. 其實我哋唔止靠熱誠去Run呢盤生意, 我哋仲要靠耐性同長命先捱到落去, 所以呢10年, 我哋過咗歐洲班同事最大個體會係(當地人唔覺有咩問題), Red tape is tougher than bedrock / "Det er lettere å bore 1000 meter ned i grunnfjellet enn å finne et smutthull i dette regelverket." (大概意思係:鑽法律隙難過鑽井). 鑽穿一公里嘅地殼, 竟然容易過喺佢哋啲規矩入面搵個窿捐出去. 當你發現鑽法律隙難過鑽井, 你會點做?

2025年特朗普未再上場, 都估佢一定會繼續大力發展頁岩油, 個技術上同我哋發展多年嘅EGS技術其實好類似, 不過歐洲而家好難過到上面講嗰個「前期」工作. 反而美國可以俾我哋專心返去做鑽井呢件事, 污糟嘢我哋又唔怕做, 只係想繼續發掘更多可再生能源, 邊到更加方便俾我哋專心鑽井搵地熱, 我哋就去邊到鑽.

我哋已遷冊至新加坡

2026年之前,我哋至少做啱咗:

1. 完成遷冊去新加坡呢項龐大而有趣嘅工程.
2. 趁EGS仲有可觀嘅發展空間,落重注將研發重心,由挪威搬去美國.

睇人打牌睇咗幾十年,我嘅領悟係,其實做生意其實同打牌好似.唔係人人都適合坐低慢慢造牌,甚至而家直情唔做牌,呢個年代講快上快落,抽水都抽得快啲.今時今日嘅能源工程一樣,探井,鑽井要等5-10年先有機會成功商運,但現實係唔搵人融資,現金流好易頂唔順.所以呢幾年我提出,與其等口井,反正我哋研發咗好多鑽井工具,不如拎埋出嚟賣好過.

我哋做咗幾十年工業生產線Sensor,鑽過隧道,排污渠,近10年開始鑽井,完全了解到鑽井會遇到咩問題,管理生產線有咩顧慮,呢次見美國鑽頁岩油同我哋EGS技術可以話完全對接,所以呢次全力向美國輸出技術.

遷冊去新加坡呢一步,老實講完全唔浪漫,呢4年來長期喺3個時區之間覆電郵,基本上長期Jet lag狀態,搞足4年先完成,但我知呢個係進入美國市場嘅最低消費,捱過呢關,先有資格去美國搵食.