上次講過我舖頭做緊地熱能嘅工程,呢次繼續講吓環保嘢,呢個字香港好少推,但爬咗香港頭嘅新加坡近年就大推呢個概念 - RE100.
「RE」就係Renewable Energy,中文即係「再生能源」,而「100」就係指100%,RE100即係100%再生能源,但要小心零碳唔等於再生能源,唔等於綠電,好似核電好多地方會叫零碳,包括香港,正因為香港背靠祖國,東南沿岸又係咁起核電廠,所以你回想吓,政府比較少講「可再生能源」,反而講零碳多.
講吓核電,佢喺發電過程,唔會點產生溫室氣體, 睇落好似好乾淨咁.但RE100嘅定義好嚴格, 只計真正「可再生」嘅能源.核電嘅燃料(鈾)係要開採嘅,總有用完嘅一日, 所以唔算再生能源.再加上核廢料處理問題,到底核電夠唔夠環保一直都好有爭議,但用核電駁唔到嘅係,佢真係平,至少可見嘅幾十年,佢應該都係最平嘅發電系統,大前題係唔將處理核廢料呢個放入發電成本入面.
講返RE100成員暫時主要由啲大公司好似Apple, Google, IKEA參加, 涵蓋科技,製造,零售,金融等行業, 而美國,日本與英國企業佔多數. 企業透過 PPA,自建電廠或購買能源屬性證書實現目標, 由此見得環保對呢類大牌子嘅公司形象好緊要.
香港政府喺呢方面直情係大幅落後,但新加坡呢方面極度積極,將綠色能源轉型視為國家級戰略,好似綠電咁,佢會向唔同國家購買可再生電力,其中包括遇到少少問題嘅澳洲Sun Cable計劃,而同鄰國購買綠電計劃,至少有印尼,泰國,馬來西亞,柬埔寨同寮國等國家參與.
反觀香港,能源政策主力都係放喺入口核電,對於購買可再生電力,至今都未見有清晰嘅方案或路線圖. 喺咁嘅環境底下,我哋呢啲做緊可再生能源嘅公司,留港發展嘅空間可以話係冇,所以近年為咗公司嘅將來,我哋只好無奈部署遷冊到新加坡嘅計劃.