如果你係羊肉批發商,明知個客係掛羊頭賣狗肉,你仲會唔會供貨呢?
地熱發電真係夠環保,理論上差唔多做到24/7發電,亦即「所謂」嘅基載發電,冇大部份可再生能源嘅間歇性發電,不過地熱發電又有佢地獄嘅部份,例如某啲鑽井工程較易搞到地震,有污染甚至流失地下水嘅機會等.
話說今年我哋都有試過加洲個大地熱發電Project,不過地熱發電只係為整靚個ESG故仔.話說個金主本身都係做油田,探井同鑽探呢啲嘢,佢哋自己做返唔會搵其他公司做,我哋個Base喺歐洲,所以無論係人工定係安全標準,都「離地」過美國好多,成本上完全冇得揮,我哋一定唔夠砌,所以我哋推過吓自己套探測同感應系統,點知做地熱嗰邊唔中,反而做鋰電個部門就好積極.
咁再查多次先知,原來人哋睇中嘅係地下鹽水,將入面嘅鋰抽取出嚟,回收率超過95%,根據佢哋計嘅數, 賣鋰礦每年嘅收入,係賣電嘅十幾廿倍,而當地係極度乾旱嘅沙漠地區,我唔知佢有咩新科技,但我哋鑽地熱井咁多年,聽落呢單嘢好大機會都會製造地震同搞到啲地下水.
其實做得可再生能源,又唔係賺得多,大部份行家,包括我哋舖頭,都有心為地球出一分力,況且商譽對我哋呢種細公司嚟講太重要,所以呢單生意我哋自己放棄.